Rugby League

Rugbyliga of Rugby League^[1][2][3] is 'n kontakspansport wat met 'n rugbybal gespeel word^[4] deur twee spanne van dertien spelers op 'n reghoekige grasveld. Rugby league is een van die twee vorme van rugbyvoetbal (Rugby Union oftewel rugby, soos dit algemeen in Suid-Afrika bekend staan, is die ander vorm) en word deur baie as een van die fisies strafste vorme van enige spansport beskou.^[5]

Rugby league ontleen sy naam van die Rugby Football League wat in 1895 gestig is toe die Northern Rugby Football Union weggebreek het van die Engelse Rugby Football Union (RFU), hoofsaaklik oor argumente oor betalings aan spelers. Beide organisasies het die spel aanvanklik onder soortgelyke reëls gespeel totdat daar 'n skeuring van RFU-geaffilieerde klubs in Australië en Nieu-Seeland in 1907 en 1908 plaasgevind het en sogenaamde rugby football leagues daar gestig is.

'n Veranderde stel reëls is hierna bekend gestel en 'n nuwe vorm van rugbyvoetbal is gebore. Die Northern Football Union het sy naam na die Northern Rugby Football League verander in 1922 en later ook van die Northern in die naam ontslae geraak. Sodoende het die sport self mettertyd ook die naam "rugby league" gekry. Oor die jare heen het die reëls van beide vorme van rugbyvoetbal merkbaar verander sodat rugby league en rugby union vandag twee duidelik onderskeibare sportsoorte is.

1. ↑ "'What is Rugby League?' Rugby League European Federation". Geargiveer vanaf die oorspronklike op 20 Julie 2009. Besoek op 26 Junie 2009.
2. ↑ "'The RLIF'". Geargiveer vanaf die oorspronklike op 9 Februarie 2009. Besoek op 26 Junie 2009.
3. ↑ International Laws of the Game, bl.51 [1] Geargiveer 26 Maart 2009 op Wayback Machine
4. ↑ International Laws of the Game, bl.8 [2] Geargiveer 26 Maart 2009 op Wayback Machine
5. ↑ Meares, Peter (2003). Legends of Australian sport: The Inside Story. Australia: University of Queensland Press. p. 132. ISBN 9780702234101.